Gall iechyd meddwl gwael ddigwydd ar unrhyw adeg yn ystod oes. Ond gydag effeithiau’r pandemig yn chwarae’n drwm ar iechyd meddwl pobl o bob oed, ynghyd â bron i ddyblu’r atgyfeiriadau i wasanaethau iechyd meddwl plant yng Nghymru, ni fu’r angen am ddadansoddiad ar sail tystiolaeth erioed yn fwy amserol.

Bydd rhaglen ymchwil Iechyd Meddwl YDG Cymru dan arweiniad yr Athro Ann John yn canolbwyntio ar faterion gorbryder, iselder a hunanladdiad ac atal hunan-niwed yn unol ag ymrwymiad Llywodraeth Cymru i fuddsoddi mewn iechyd meddwl drwy ailgynllunio gwasanaethau i “wella atal, mynd i’r afael â stigma. a hyrwyddo agwedd ddi-ddrws anghywir at gymorth iechyd meddwl”.

Er y bu cynnydd eisoes mewn tueddiadau cyn y pandemig, nod y tîm ymchwil yw deall yn well effeithiau’r pandemig ei hun ar iechyd meddwl plant a phobl ifanc. Caiff y dadansoddiad hwn ei lywio gan ymchwil flaenorol y tîm ar absenoldebau a gwaharddiadau o’r ysgol a’u cysylltiadau â diagnosis iechyd meddwl. Yn y pen draw, y gobaith yw y gall darparu sylfaen dystiolaeth arwain at bolisïau ac arferion sy’n canolbwyntio ar adnabod a thrin iechyd meddwl gwael cyn gynted â phosibl cyn cyrraedd pwynt argyfwng.

Mae gan y rhaglen ymchwil Iechyd Meddwl gysylltiadau cryf â nifer o sefydliadau a grwpiau llywio iechyd meddwl blaenllaw. Ann o YDG Cymru yw Prif Ymchwilydd a Chyd-gyfarwyddwr DATAMIND, Canolfan Ymchwil Data Iechyd ar gyfer Iechyd Meddwl. Mae hi hefyd yn arwain y Llwyfan Data Iechyd Meddwl Glasoed, Cronfa Ddata Gwybodaeth am Hunanladdiad-Cymru, ffrydiau gwaith gwybodeg Canolfan Wolfson ar gyfer Iechyd Meddwl Pobl Ifanc a’r Ganolfan Genedlaethol ar gyfer Iechyd Meddwl, tra’n gysylltiedig â nifer o sefydliadau iechyd meddwl eraill.